У Беларусі пачынаецца вакцынацыя насельніцтва расійскай вакцынай "Спадарожнік V"

Міністэрства аховы здароўя Беларусі, Міністэрства аховы здароўя Расіі і Расійскі фонд прамых інвестыцый (РФПІ) аб'яўляюць аб пачатку вакцынацыі насельніцтва Беларусі расійскай вакцынай супраць каранавіруса "Спадарожнік V". Сёння першая партыя вакцыны прыбыла ў Беларусь. Аб гэтым БЕЛТА паведамілі ў прэс-службе Міністэрства аховы здароўя.

Міністр аховы здароўя Дзмітрый Піневіч адзначыў, што "імунізацыя застаецца важнейшым кампанентам у барацьбе з эпідпрацэсам. Сёння ў нас пачнецца новы этап - масавая вакцынацыя супраць COVID-19. Першымі будуць вакцынаваны медыцынскія работнікі, педагогі і тыя спецыялісты, якім з-за асаблівасцей прафесіі даводзіцца шмат кантактаваць з людзьмі. Вакцынацыя будзе праводзіцца ў добраахвотным парадку".

Паводле яго слоў, у Беларусі створана сістэма захоўвання вакцыны, якая дае магчымасць выконваць халадовы ланцужок, закуплена спецыяльнае медыцынскае маразільнае абсталяванне, якое дае магчымасць транспартаваць вакцыну. Дзмітрый Піневіч таксама дадаў, "мы дзякуем расійскаму боку за актыўнае ўзаемадзеянне і стратэгічнае супрацоўніцтва ў вырашэнні гэтага пытання".

Міністр аховы здароўя Расіі Міхаіл Мурашка адзначыў, што хуткі доступ Беларусі да расійскай вакцыны стаў магчымы дзякуючы эфектыўнай рабоце беларускай рэгулятарнай сістэмы. "Важна падкрэсліць рацыянальны падыход краіны-суседкі да лакальных клінічных даследаванняў вакцын. Пратакол праведзенага ў краіне клінічнага даследавання даў магчымасць у сціслыя тэрміны пацвердзіць валіднасць шырокіх расійскіх даных клінічнага вывучэння "Спадарожнік V" для жыхароў Беларусі", - сказаў ён.

Гендырэктар Расійскага фонду прамых інвестыцый (РФПІ) Кірыл Дзмітрыеў заявіў, што Беларусь стала першай замежнай дзяржавай, якая афіцыйна зарэгістравала вакцыну. "Сёння Беларусь таксама стала першай краінай, дзе пачынаецца шырокая вакцынацыя насельніцтва прэпаратам "Спадарожнік V". Наступным этапам супрацоўніцтва РФПІ і партнёраў стане арганізацыя выпуску гатовай формы вакцыны ў Беларусі, што істотна спросціць лагістыку, дасць магчымасць паскорыць тэмпы вакцынацыі і пашырыць прафілактыку захворвання", - рэзюмаваў ён.-0-

Усе навіны