Лепшых назвалі поле і ферма...
Па добрай традыцыі, што склалася на Кругляншчыне, гэтыя два масавыя мерапрыемствы – падвядзенне вынікаў вясенне-палявых работ (па народнаму “маёўка”) і дзень грамадзянскай абароны -- праходзяць у нас адначасова. Вось і ў мінулую суботу гарадскі стадыён сабраў сотні людзей. Уся дзея пачалася з агульнага пастраення ўдзельнікаў фарміраванняў грамадзянскай абароны і пераможцаў працоўнага спаборніцтва.
Яравая сяўба ў гаспадарках раёна праведзена на плошчы 16 тысяч гектараў у лепшыя агратэхнічныя тэрміны і пры высокай якасці. Прыемна адзначыць, што сёлетняя пасяўная праведзена ў асноўным уласнымі сіламі гаспадарак дзякуючы таму, што на палеткі прыйшла высокапрадукцыйная і многафункцыянальная тэхніка. Дзякуючы падтрымцы дзяржавы былі выдаткаваны сродкі на набыццё насення, запасных частак, паліва і змазачных матэрыялаў. Пад поўную патрэбу раён змог набыць мінеральныя ўгнаенні і сродкі аховы раслін.
Ставіцца задача атрымаць на круг не менш 45 цэнтнераў зерня з гектара і забяспечыць валавы яго збор у аб’ёме 53 тысяч тон.
Узнагароды тым, хто вызначыўся, уручаў непасрэдна старшыня райвыканкама Анатоль Дуцько.
Дыпломы і грашовыя прэміі за першае месца дасталіся калектывам СВК “Іскра” (кіраўнік С. Фалецкі); прыватнага ўнітарнага прадпрыемства “АСБ Цяцерына” (кіраўнік М. Радзько); за другое месца – СВК “Комсенічы” (в.а. старшыні В. Тонкі) і СВК “Круглянскі Рассвет” (кіраўнік А. Сімчанка); за трэцяе месца – СВК “Калгас “Друць” (кіраўнік С. Сазонаў) і ДП “Някрасава-Агра” (кіраўнік А. Макаеў).
Рашэннем райвыканкама адзначана таксама станоўчая работа дзесяткаў індывідуальных лідэраў пасяўной.
Для лепшых працаўнікоў Кругляншчыны гучалі ў той дзень і самыя лепшыя песні ў выкананні самадзейных артыстаў РДК.
Актыўна прайшлі ў той дзень у раёне і спаборніцтвы фарміраванняў грамадзянскай абароны.
Калектывы-пераможцы таксама былі ўзнагароджаны Дыпломамі і грашовымі прэміямі райвыканкама.