Сустрэча прайшла ў Бушоўцы
4 снежня, Круглае /Уласн. інф./. У пятніцу, 28 лістапада, адбыўся чарговы выезд “агітпоезда”, удзельнікі якога з месяца ў месяц наведваюць аддаленыя і маланаселеныя вёскі раёна, каб даведацца аб жыцці іх насельнікаў, аб праблемах, з якімі яны сутыкаюцца.
Сустрэча з вяскоўцамі на гэты раз прайшла ў вёсцы Бушоўка Комсеніцкага сельскага Савета. У пакоі адпачынку жывёлаводаў мясцовай малочнатаварнай фермы сабраліся пастухі і даяркі, а таксама пенсіянеры з Бушоўкі і Рабінаўкі. Для падвозкі людзей з гэтай вёскі быў выдзелены транспарт.
Адкрываючы сустрэчу, галоўны спецыяліст аддзела ідэалагічнай работы райвыканкама Валянціна Пырко праінфармавала прысутных аб выніках сацыяльна-эканамічнага развіцця раёна за 10 месяцаў г.г., падзеях, якія адбыліся апошнім часам у жыцці Кругляншчыны. Старшыня Комсеніцкага сельскага Савета дэпутатаў Аляксей Рыбакоў расказаў аб рабоце, якая праводзіцца сельвыканкамам па добраўпарадкаванню населеных пунктаў.
Удзельнікі “агітпоезда”, у ліку якіх былі спецыялісты вядучых раённых службаў, адказалі на пытанні вяскоўцаў.
У ліку тых, хто браў удзел у сустрэчы з жыхарамі Бушоўкі і Рабінаўкі, быў і ўрач Комсеніцкай сельскай урачэбнай амбулаторыі Леанід Краўцоў. Ён змерыў жадаючым артэрыяльны ціск, пракансультаваў, якія лекі трэба ўжываць пры тым або іншым захворванні.
А затым перад вяскоўцамі выступілі з невялікай канцэртнай праграмай артысты РДК і Комсеніцкага сельскага Дома культуры.