24 августа 2026

Дакрануцца да спадчыны продкаў: у рамках праекта «Кожная пятніца – роднае, сваё» удзельнікі клубаў «Кудзесніца» і «Алеся» наведалі «Вялікае княства Сула»

Далучыцца да рэспубліканскага праекта «Кожная пятніца – роднае, сваё» і дакрануцца да багатай культурнай спадчыны продкаў змаглі ўдзельнікі клубаў «Кудзесніца» і «Алеся», якія дзейнічаюць на базе філіяла Елькаўшчынскі клуб-бібліятэка Круглянскага раёна. Месцам іх новай захапляльнай паездкі стаў знакаміты парк гісторыі «Вялікае княства Сула».

Панскі маёнтак «Сула» — гэта ўнікальны гісторыка-культурны комплекс, дзе кожны куток дыхае мінулым. Падчас экскурсіі ўдзельнікі паездкі пазнаёміліся з багатай гісторыяй гэтых мясцін. Яны даведаліся пра першых уладальнікаў сядзібы — магутны род Радзівілаў, якія пазней прадалі маёнтак знатнаму шляхецкаму роду Ленскіх.

У гэтым музейным комплексе час нібы замірае, дазваляючы прайсці скрозь стагоддзі і эпохі беларускай гісторыі. Госці з Елькаўшчыны атрымалі масу станоўчых эмоцый, адкрываючы для сябе новыя старонкі роднай культуры. Кожны з удзельнікаў змог заўважыць тут нешта сваё, асаблівае.   

Гэта паездка пакінула глыбокі след у душах экскурсантаў, выклікаўшы шчырае пачуццё гонару і павагі да нашага мінулага, а таксама ўсведамленне таго, што ўсе мы — неад'емная часцінка нашай цудоўнай беларускай зямлі.

Таццяна Радоўская, метадыст РДК
ДУК «Цэнтралізаваная клубная сістэма
Круглянскага раёна»